ပြီးခဲ့တဲ့ ၂၈ ရက်မှာ မီးလောင်ပေါက်ကွဲခဲ့တဲ့ စက်ဆန်း ဂိုထောင်တွေဘက်ကို နောက်တစ်ခေါက်ရောက်သွားဖြစ်ပါတယ်။ ပထမတော့ ဒုက္ခသည်စခန်းဘက်မှာ မနက်ပိုင်း ၃၀ ရက်နေ့မှာ ဓာတ်ပုံရိုက်ဖြစ်ပါတယ် နောက်တော့ မနီးမဝေးမှာ ရှိတဲ့ မီးလောင်ပြင်ကိုသွားဖြစ်တယ်။ ဝင်ဝင်ခြင်းမှာ အစောင့်ရဲအရာရှိတွေနဲ့ နဲနဲစကားပြောလိုက်ရတယ်။ နောက်တော့ အိုကေသွားတာနဲ့ အထဲ ဂိုထောင်တွေဘက်ကို အရင်ဝင်ဖြစ်ပါတယ်။ အထဲမှာ မီးမလောင်ပဲ အမိုးပျက်စီးရုံ ပြိုကျရုံလောက်ဖြစ်တဲ့ ဂိုထောင်တွေမှာ ပစ္စည်းတွေ ကုန်ကားနဲ့ သယ်နေကြတာတွေ့ပါတယ်။ ဒီ ဂိုထောင်တန်းတွေမှာ ဘာအဓိကထားလဲ ပြောရခက်ပါတယ်။ အားလုံးက စီးပွားရေးလုပ်ငန်းရှင် အမျိုးမျိုးဆိုတော့ တစ်ချို့ အခန်းတွေမှာ စားသောက်ကုန် ပဲစေ့လို အိတ်တွေရှိတယ်။ တော်တော်လေးကံကောင်းပြီး ကျန်ခဲ့တဲ့ အခန်းတစ်ခုက ​air con အကြီးစားတွေ မပျက်စီးပဲ ရှိနေတာ တွေ့ရပါတယ်။

တစ်ချို့အခန်းတွေက ထိုင်းကလာတဲ့ စားသောက်ကုန်၊ အချိုရည်၊ ကော်ဖီမစ်ထုတ်တွေ ရှိတယ်။ တစ်ခန်းမှာတော့ ပေပါအနီတွေနဲ့ စားသုံးဆီလား ဓာတုဗေဒ အရည်လား မကွဲတဲ့ ပေပါတွေ အများကြီးတွေ့ပါတယ်။ တစ်ခန်းမှာတော့ ထောင်ချီမယ်ထင်တယ် စတီး ဒန်အိုး၊ ခွက်၊ ချိုင့်တွေ တွေ့ရပြန်ပါတယ်။ အဲဒီအခန်းဆို တစ်ခန်းလုံး စတီးအိုးတွေ ခွက်တွေမီးလောင်တစ်ဝက်နဲ့ ပြန့်ကျဲနေတာမို့ အပေါ်စီးကနေရိုက်ရင် ကောင်းမယ့် pattern ဖြစ်နေပေမယ့် ဝင်ဖို့မလွယ်လို့ မဝင်ခဲ့ပါဘူး။ ဘာလို့လဲဆိုတော့ အပေါ်မှာ မီးလောင်ပြီး စုတ်ပြတ်နေပြီ မနက်ကပဲ ဒုက္ခသည်စခန်းမှာ မီးလောင်ပြင်က ထုတ်တန်းပြုတ်ကျလို့ လူနာတစ်ယောက် ရောက်လာတာတွေ့တော့ မဝင်ရဲဘူးဖြစ်သွားတယ်။ အဲဒီအခန်းက ကျွန်တော်ဟိုတစ်နေ့က တင်ခဲ့တဲ့ ဓာတ်ပုံ ၂ ပုံမှာ ဂိုထောင်မီးလောင်နေတဲ့ နေရာပါပဲ။

နောက်တော့ ဂိုထောင်ရဲ့ အရှေ့မြောက်ထောင့် ပုဇွန်တောင်ချောင်းနဲ့ ကပ်ရပ်မှာ ရှိတဲ့ ပေါက်ကွဲမှု့ဖြစ်တဲ့ ဂိုထောင်ခန်းကိုရောက်ဖြစ်ပါတယ်။ ဂိုထောင်ခန်းလို့ ပြောပေမယ့် အားလုံးက မြေပြင်မှာ ပြားပြားဝပ်နေပါပြီ ခန့်မှန်းပြီးပြောတာပါ။ အဲဒီ ကျင်းဟာ MRTV က ကြေငြာသွားတဲ့အတိုင်း အချင်း ပေ ၄၀ အနက် ၁၅ ပေလောက်ရှိမှာပါ။ တိုင်းရင်းဆေးတွေ ထားတဲ့ အခန်းဖြစ်နိုင်ပါတယ်။ အဲဒီကျင်းရဲ့ ပတ်ပတ်လည်မှာ ကျောက်ချဉ်၊ နနွင်း နဲ့ ဆားချောတွေ ခုထိမီးလောင်ပြီး အငွေ့ထွက်နေတာ တွေ့ရပါတယ်။ ပေါက်ကွဲတဲ့ကျင်းရဲ့ အားကို ခန့်မှန်းဖို့ သိပ်မခက်လှပါဘူး ဒီကျင်းအောက်က ကျန်ခဲ့တဲ့ အင်္ဂတေထုဟာ အနဲဆုံး ၃ ပေအနက်လောက် အောက်ခံ foundation ရှိပါတယ်။ အဲဒီ အခံမှာ ၁၅ ပေလောက်နက်တဲ့ ကျင်းဖြစ်တဲ့ အားကို ခန့်မှန်းကြည့်လို့ ရပါတယ်။ ဒီ ဂိုထောင်ကို အင်္ဂလိပ်ခေတ်က အခိုင်အခန့်ဆောက်ခဲ့တာလို့ ဘေးနားက ဒေသခံပြောပြချက်အရသိရပါတယ်။ ဒီကျင်းရဲ့ ပေါက်ကွဲအားကြောင် ဂိုထောင်နဲ့ ပေ ၂၀၀ အကွာလောက်က လူနေအိမ်တွေက အလုံးလိုက်ပြိုကျနေတာတွေ့ရပါတယ်။

အဲဒီအိမ်တွေရှေ့က အုန်းပင်မှာ ၅ မူးသံချောင်းစိုက်နေတာတွေ့ရသလို ရိုးရိုးဝါးခြမ်းပြား ပါစိုက်နေတာ တွေ့ရပါတယ်။ ဝါးခြမ်းပြားကို အမှန်တော့ အုန်းပင်မှာ တူနဲ့ ရိုက်သွင်းပါဆိုတောင် လွယ်တဲ့ ကိစ္စ မဟုတ်ပါဘူး။ ဒါပေမယ့် အဲဒီလို ဝင်နေတာ တွေ့ခဲ့ရပါတယ်။ နောက် အိမ်တစ်အိမ်က ချိတ်ထားတဲ့ ကျားရုပ်မှာ သစ်သားချောင်းတွေ စိုက်နေတာလဲ တွေ့ခဲ့ရပါတယ်။ နောက်တော့ အဲဒီ လူနေရက်ကွက်ဘက်ကို ဓာတ်ပုံရိုက်ဖြစ်ပါတယ်။ အဲဒီ မျက်နှာစာတန်းပြီး နောက်လမ်းမှာတော့ တံမြတ်စီးလှည်းနေတဲ့ ဦးလေး တစ်ယောက်တွေ့လို့ ဝင်ရောက်မေးမြန်းတဲ့ အခါ သူက မီးလောင်ပြီးမှ နယ်က ပြန်လာတာ ဖြစ်တယ်လို့ သိရတယ်။ အဲဒီဦးလေးသားကတော့ မီးလောင်တုန်းမှာ မီးသတ်ကားကို သွားကူပေးနေရင်း ပေါက်ကွဲတာကြောင့် ပေ ၁၀၀ လောက် သူတို့ ဒုတိယလမ်းပါကျော် လွင့်ထွက်သွားပြီး နာရီဝက်လောက် သတိလစ်နေတယ်လို့ ဆိုပါတယ်။ နောက်မှ ဆေးရုံသွားရတယ်ပြောပါတယ်။

အချို့တွေက လွင့်ထွက်ပြီး ၂ ထပ်သစ်သားအိမ်တွေ အပေါ်ပါလွင့်ထွက်ကုန်တဲ့ အထိပြင်းပါတယ်။ ပေါက်ကွဲရာက ထွက်လာတဲ့ အုတ်စ၊ ခဲစတွေဟာ ကျည်ဆံလို အားပြင်းပြီး ထိသမျှလူ အစိတ်အပိုင်းတွေ စုတ်ပြတ်ထွက်ကုန်ပါတယ်။ ခေါင်းပြတ်သွားတာတွေလဲ ရှိတယ်လို့ ပြောပြပါတယ်။ ပေါက်ကွဲမှု့က မီးလောင်ပြီး မကြာခင် အချိန်လေးတင်ပဲဖြစ်တာမို့ ပထမဆုံးရောက်ခဲ့တဲ့ မီးသတ်ကား နောက် ရက်ကွက်ထဲက ဝင်ရောက်မီးငြိမ်းပေးသူ အတော်များများ အသက်ပေးခဲ့ရတယ်လို့ ကြားရပါတယ်။ နောက်တစ်ဖက်ခြမ်းဘက်မှာတော့ အမေအိုတစ်ယောက် အိမ်ပျက်ထဲထိုင်နေတာ တွေ့လို့ ဝင်ရောက်မေးမြန်းဖြစ်ပါတယ်။ အမေကြီးရဲ့ ပြောစကားတွေကို ဗီဒီယိုမှာ ကြည့်လို့ ရပါတယ်။ အရမ်းစိတ်မကောင်းဖြစ်ရပါတယ် အမေကြီးက သူ့ယောကင်္ျားနဲ့ ၂ ယောက်ထဲ အဲဒီ အခန်းကျဉ်းလေးမှာ ငှားနေရတာလို့ သိရတယ်။ ကျွန်တော့်ကိုတောင် ဧည်ခံစရာရေပဲရှိလို့ အားနာနေပုံရတဲ့ အမေကြီးကိုကြည့်ပြီး ဝမ်းနည်းရပါတယ်။ အသက်မသေခဲ့တာပဲ ကံကောင်းတယ် ပြောရမလိုပါပဲ။

ပေါက်ကွဲအားကြောင့် အဲဒီဘက်က အိမ်အားလုံးနီးပါးပြိုကျ အမိုးမရှိဖြစ်ကုန်တာ တွေ့ရပါတယ်။ အပြင်ဘက်လမ်းပေါ်မှာတော့ ကြံခိုင်ရေးက လာလှူတဲ့ အစားအသောက်တွေ ဝေနေတာ တွေ့ရပါတယ်။ နောက် ရုပ်ရှင်ထဲက လူကြမ်းမင်းသားတွေ အဖွဲ့ဖြစ်တဲ့ ကိုလူချောတို့ အဖွဲ့လဲ လှူဒါန်းရင် လုပ်အားဒါန ပေးနေတာ တွေ့ရပါတယ်။ ဒုက္ခသည်စခန်းမှာတော့ ကြက်ခြေနီ၊ စစ်တပ်က ဆေးအဖွဲ့တွေ၊ NLD ပါတီ၊ ကြံခိုင်ရေး စတဲ့အဖွဲ့တွေ ဆေးပေးခန်းတွေ အလှူတွေလုပ်နေတာ တွေ့ရလို့ သာဓုခေါ်ရပါတယ်။ အပြန်မှာ ရုပ်ရှင်မင်းသား၊ မင်းသမီးတွေ၊ အဆိုတော်တွေ လာပြီး လှူဒါန်းကြတာကိုလဲ တွေ့ရပါတယ်။ လက်ရှိတော့ အိမ်တွေမှာ အဝတ်အစား၊ အစားအသောက် အဆင်ပြေပေမယ့် အိမ်တွေပြန်ပြင်နိုင်ဖို့က အရေးကြီးလိုအပ်တယ်လို့ သိရပါတယ်။

ဒီဖြစ်ရပ်နဲ့ အပျက်အစီး ဧရိယာကြီးဟာ 2008 တုန်းက ကြည့်ခဲ့ဖူးတဲ့ The Kingdom ကားထဲက အမေရိကန်သံရုံး ဗုံးဖောက်ခွဲသလိုမျိုး ကျင်းကြီးနဲ့ ပေါက်ကွဲအား ပြင်းလှပါတယ်။ ဒီပေါက်ကွဲအားကြောင့် ဒေါပုံဘက်က ကျွန်တော်ညတွင်းချင်းသွားခဲ့တဲ့ ရက်ကွက်က ကလေး ၂ ယောက်လဲ သေဆုံးသွားခဲ့ပြီလို့ သိရပါတယ်။ အတည်မပြုနိုင်တဲ့ သတင်းအရ ပုဇွန်တောင်ချောင်းမှာလဲ အလောင်းတွေပေါ်တယ်လို့ ကောလဟာလလိုလို ကြားရပြန်ပါတယ်။ စိတ်မကောင်းဖြစ်မိသလို အစိုးရ ဥပဒေပြု အဖွဲ့အစည်းတွေ အနေနဲ့ မြို့တွင်းမှာ အဲဒီလို သိုလှောင်ရုံတွေ ဆောက်လုပ်ခွင့်မပြုဖို့။ ဂိုထောင်တွေမှာ ဘာတွေလှောင်ထားတယ်ဆိုတာ အပြင်မှာ စာကပ်ထားဖို့ လိုပြီလို့ ထင်ပါတယ်။ နောက် မီးသတ်အဖွဲ့တွေကိုလဲ အဆင့်မြင့်ပေးသင့်ပါပြီ မီးသတ်ရဲဘော်တွေဟာ တကယ့်ကို မျက်မြင်ကိုယ်တွေ့ပါ ကိုယ့်အိမ်မီးလောင်နေသလို ကြောက်လှန့်မှု့ မရှိပဲ ငြိမ်းသတ်ခဲ့ကြတာပါပဲ။ ဒါပေမယ့် သူတို့မှာ မျက်နှာမှာ gas mask လိုမျိုး မရှိသလို အခြား ခေတ်မှီ ကရိယာတွေလဲ မရှိကြတဲ့ အတွက် အန္တရာယ် အလွန်များလှပါတယ်။ ဆေးပစ္စည်း ကုန်ကြမ်းတွေဟာ ဆေးဆိုပေမယ့် မီးစုပြီးလောင်ရင် ဓာတုဗေဒ အဆိပ် gas ဖြစ်တာပါပဲ။ မျက်နှာကို တစ်ချက် ရိုက်လိုက်ရင် တော်ရုံလူမေ့လဲသွားနိုင်လောက်ပါတယ်။ တတ်နိုင်ရင် အစိုးရ ဘတ်ဂျက်တိုးချသင့်သလို အလှူရှင်တွေ အနေနဲ့လဲ မီးသတ်ကို လှူပေးသင့်ပါတယ်။ အစိုးရ အနေနဲ့ ဥပဒေတွေနဲ့ စီးပွားရေးသမားတွေလက်ကနေ မရှိဆင်းရဲသားတွေ ခေါင်းပုံဖြတ်ခံရတာမျိုးတွေ ကာကွယ်ပေစေချင်တယ်၊ Safty first ဆိုတာကို လက်တွေ အကောင့်အထည်ဖော်စေချင်ပါတယ်။ ဒီနှစ်မှာတော့ အားလုံးဘေးကင်းဖို့ ဆုတောင်းပါတယ်။

Related Posts

• Explosion At A Warehouse in Yangon, Myanmar
• NLD Party’s Charity Music Concert
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home
• Democracy Activists Pray At Shwe Da Gon Pagoda

၃၀ ရက်နေ့မှာ National League for Democracy Party က ပညာရေးရန်ပုံငွေအတွက်လုပ်တဲ့ show ပွဲကို ရောက်ဖြစ်ပါတယ်။ ဒီပွဲကို MCC မှာ ညနေ ၃ နာရီကစလုပ်တာ ဖြစ်ပါတယ်။ အပြင်ဘက် ကွင်းပြင်မှာလုပ်ပြီး စျေးဆိုင်တန်းတွေနဲ့ တော်တော်စည်ပါတယ်။ ဖွင့်ပွဲ အခန်းအနားကို ဒေါ်အောင်ဆန်းစုကြည် ကိုယ်တိုင်တက်ရောက် အမှာစကားပြောပြီး အဆိုတော်များနဲ့ အတူဖွင့်လှစ်ပါတယ်။

Show ပွဲလို လူစည်တဲ့နေရာ သိပ်သွားလေ့မရှိတဲ့ ကျွန်တော့်အတွက်တော့ ဒီပွဲက ထူးထူးခြားခြားပါပဲ ဘာလို့လဲဆိုတော့ stage စင်အကြီးကြီးဆောက်ထားတာတွေ့ရတာရယ်။ နောက် backdrop design ကိုလဲ ကြိုက်တာလဲပါတယ် စင်တစ်ခုလုံး အနီရောင်နောက်ခံနဲ့ ဘာစာသားမှ မပါပဲ အန်တီစုပုံ graphic art နဲ့ အရှင်းလုပ်ထားတာကို အရမ်းကြိုက်တယ်။ ဘေးဘက် တစ်ဖက်စီမှာတော့ အန်တီပုံအကြီးကြီး ၂ ခုထောင်ထားတယ်နောက် LED Screen အကြီးကြီးတစ်ခုထားပေးထားတာ ရှိတယ် နောက် ကွင်းအလယ်နဲ့ အနောက်ဖက်တွေမှာ အန်တီပုံ နောက် အမျိုးသားဒီမိုကရေစီ အဖွဲ့ချုပ် ဆိုတဲ့ ဘုတ်အကြီးကြီးတွေနဲ့ ကြည့်ရတာ Woodstock လို ဂီတပွဲမျိုးနဲ့ အတော်တူပါတယ်။ ကြားရသလောက် ဒီပွဲမှာ ဖျော်ဖြေဖို့ U2 အဖွဲ့နဲ့ Black Eye Peas အဖွဲ့က ကမ်းလှမ်းသေးတယ်လို့ ဆိုပါတယ် အကြောင်းကြောင်းကြောင့် သူတို့ ပါခွင့်မရလိုက်ဖူးထင်ပါတယ်။

နောက် အဆိုတော်တွေ၊ bands တွေလဲ အများကြီး သိရသလောက် အဆိုတော် ၆၀ နီးပါးလောက်က သီဆိုပေးပါတယ်။ တကယ့်ကို woodstock လိုပဲ ဒါပေမယ့် စည်းကမ်းရှိပြီး သေသပ်တဲ့ပွဲပါပဲ အထဲမှာ မူးရူးသောင်းကျန်းတဲ့သူ မပါဘူး။ အန်တီစု ကတော့ ပရိတ်သတ်တွေရဲ့ အလယ်နားမှာထိုင်ပါတယ် ရှေ့ဆုံးခုံတန်းမှာ မထိုင်ပါဘူး။ ဒီပွဲမှာ စင်ပေါ်မှာ အန်တီပုံ ရိုက်နှိပ်ထားတဲ့ t-shirt ၂ ထည်ရှိပြီး အဲဒီပေါ်မှာ အဆိုတော်တွေ၊ ဂီတပညာရှင်တွေက လက်မှတ်ရေးထိုးပေးကြပါတယ်။ အဲဒီ ၂ ထည်မှာ ၁ ထည်ကို အန်တီကို အမှတ်တရပေးမှာ ဖြစ်ပြီး ၁ ထည်ကိုတော့ ပညာရေးရန်ပုံငွေအတွက် လေလံပစ်တာမှာ ကျွန်တော် ည ၁၀ နာရီပြန်လာတဲ့ အထိ စျေးက သိန်း ၇၀ ရောက်နေပါပြီ။ နောက်ဆုံးမှာတော့ ၁၂၅ သိန်းနဲ့ အမျိုးသမီး စီးပွားရေးသမား တစ်ယောက် ဝယ်ယူအားပေးသွားတယ်လို့ သိရတယ်။

ပွဲက ဘယ်အချိန်ပြီးလဲတော့ မသိပါဘူး ကျွန်တော်ကတော့ ၁၀ နာရီလောက်မှာ ပြန်ခဲ့ပါတယ်။ အဲဒီအချိန်အထိ အဆိုတော် အများကြီးမဆိုရသေးဘူးဆိုတော့ ညနက်မှပြီးတယ်ထင်ပါတယ်။ အဆိုတော်အစုံ တီးဝိုင်းအစုံနဲ့မို လာကြည့်တဲ့ ပရိတ်သတ်တွေလဲ လက်မှတ်ဝယ်ရတာ တန်တဲ့ပွဲပါပဲ။ နောက်လက်မှတ်ဖိုးတွေကလဲ အလကားမဖြစ်ပဲ ဆင်းရဲနွမ်းပါးသူတွေအတွက် ပညာရေးအထောက်အပံ့ဖြစ်တာမို့ အလှူလုပ်ပြီးသားလဲ ဖြစ်တဲ့ပွဲပါ။ ပွဲဟာ Standard ရှိပြီး ကျွန်တော် ကြုံဖူးတဲ့အထဲမှာတော့ အကြီးကြယ်ဆုံး ဂီတပွဲတော်ပါပဲ။ ၂၀၁၂ ထဲမှာလဲ ဒီလိုမျိုးပွဲနောက်ထပ် လုပ်နိုင်မယ်ဆိုရင်တော့ အတိုင်းအထက်အလွန် ကောင်းမှာပါပဲ။ မကြည့်လိုက်ရတဲ့သူတွေအတွက် နိုင်သလောက် ဗီဒီယိုလေးရိုက်ထားပြီး showreel ပုံစံလေး လုပ်ပြထားပါတယ်.. ကျွန်တော်ရှိနေတုန်းမှာ ဇော်ဝင်းထွဋ်၊ အဲလက်စ်၊ လင်းလင်း စတဲ့သူတွေ မဆိုသေးတာမို့ အကုန်မပါခဲ့ပါဘူး။ နောက် ထူးအိမ်သင် ရဲ့ ညီ အောင်အောင် ဆိုထားတဲ့ ရာဇဝင်များရဲ့ သတို့သမီး သီချင်းကိုတော့ အစအဆုံး ရို်က်ထားလိုက်တယ်။ အဲဒီကောင်ကတော့ iPhone ကင်မရာနဲ့ ရိုက်ထားတာမို့ အသံတွေဘာတွေတော့ မကောင်းပါဘူး။

ကွန်နက်ရှင် မကောင်းလို့ ဘာမှတင်မရတာနဲ့ ၂၀၁၂ ထဲတောင်ရောက်သွားပါတယ်.. အားလုံးပဲ Happy New Year ပါ….

Related Posts

• The Aftermath Of Explosion At Warehouse in Yangon
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home
• Democracy Activists Pray At Shwe Da Gon Pagoda

ဒီနေ့ မနက် ၂၉ ရက် မနက် အစောပိုင်း အမှန်တော့ ၂၈ ရက်ည ၁နာရီ ခွဲလောက်မှာ ကျွန်တော် အိမ်မှာ ကွန်ပျူတာရှေ့ထိုင် html ရေးနေတုန်း အုန်း ဆိုတဲ့ ပေါက်ကွဲသံကြီးနဲ့ အတူ အိမ်က တံခါးတွေကို တစ်ယောက်ယောက် စောင့်ကန်သလိုအသံတွေ ဘေးနားက တိုက်တွေ မှန်ကွဲသံတွေပါ ကြားလိုက်ရပါတယ်။ အမှန်တော့ ကျွန်တော် နားကျပ်နဲ့ သီချင်းနားထောင်ရင်း အလုပ်လုပ်နေတာဗျ ပေါက်ကွဲသံက ဘယ်လောက်ကျယ်လဲဆို သီချင်းသံကျော်ပြီးဝင်လာတယ်။ ဒါနဲ့ အိမ်ဝရန်တာထွက်ကြည့်တော့ မင်္ဂလာမွန်စျေး နိုက်ကလပ်တွေ ရှိတဲ့ ဘက်က လူတွေ ပြေးထွက်လာတာ၊ ကားတွေ အများကြီးထွက်လာတာ တွေ့လို့ အဲဒီမှာ ဗုံးပေါက်တယ် ထင်လိုက်တယ်။ ကင်မရာလွယ်ပြီး ဆင်းမယ်လုပ်တော့ အမေက စိတ်မချလို့ လိုက်မယ်ဆိုပြီး ပါလာပါတယ်။

အမှန်တော့ ကျွန်တော် ညဘက်အိမ်ပြန်ရောက်တာ မကြာသေးပါဘူး ၂၈ ရက်မှာ အင်ဒိုနိုင်ငံခြားရေးဝန်ကြီး press conference သွားတယ် မော်ဒယ်ရိှုး ၂ ခုဆက်တိုက်ရိုက်ခဲ့ပြီး လူလဲပြိုင်းနေပြီ web site dead line ရှိလို့ ထိုင်ရေးနေရင်းကနေ ဖြစ်တာ။ တိုက်အောက်ဖက်ဆင်းတော့ အခြား အခန်းကလူတွေရော ဝရန်တာတွေမှာ ထွက်ပြီး ကြည့်နေကြတာတွေ့ပါတယ် နောက်တော့ အသိတွေဆီက ဖုန်းဆက်ပြီး ကျွန်တော့်ကို သတင်းပေးကြတယ်။ အစက ဒေါပုံဘက်လို့ ကျွန်တော်ထင်လိုက်တာ နောက်တော့ ကားသမားတစ်ယောက်က စက်ဆန်း ဘက်ဆိုလို့ ကားငှားပြီး အပြေးသွားဖြစ်ပါတယ်။ ကျွန်တော့်အိမ်နဲ့ စက်ဆန်းနဲ့က မှတ်တိုင် ၂ တိုင်စာပဲဝေးတော့ အစောဆုံးရောက်သွားတယ်။

ဟိုမှာ မျက်နှာမှာ မှန်ထိပြီး သွေးတွေထွက်နေတဲ့ သူတွေနဲ့ အရင်စတွေ့ပါတယ်။ နောက်တော့ အဲဒီ စက်ဆန်း (ABC မှတ်တိုင်) နားက ဂိုထောင် အတန်းလိုက်မှာ မီးအကြီးအကျယ်လောင်နေတာ တွေ့ရတယ်။ နောက်တော့ အခြား သတင်းဓာတ်ပုံဆရာအကိုတွေ ရောက်လာတာမို့ သူတို့နဲ့ အတူတူ လောင်နေတဲံဂိုထောင် တွေရဲ့ နောက်ဖေးလမ်းကြားထဲ ပြေးဝင်ပြီး ဓာတ်ပုံရိုက်ဖြစ်ကြပါတယ်။ အန္တရာယ် အတော်များပါတယ် မီးအပူရှိန်ဟပ်နေတယ် ကျွန်တော် 16-35 wide သုံးပြီး video ရို်က်ထားလို့ မီးကရိုက်တဲ့နေရာနဲ့ ဝေးတယ်လို့ ထင်နေရတာ.. နောက်အဲဒီဘက်ကပြေးလာတဲ့ ရက်ကွက်သားတစ်ယောက်က ပြေးရင်းပြောပါတယ် လောင်နေတဲ့ ဂိုထောင်ပြီးရင် ကျွန်တော်တို့ ရှိတဲ့ တစ်ဖက်ခြမ်းက ဂတ်စ် အိုးတွေထားတဲ့ ဂိုထောင်တဲ့ ပြေးဆိုလို့ ပြေးရပြန်တယ်။ လေက ကံဆိုးချင်တော့ မြောက်ဖက်ကနေ ကျွန်တော်တို့ ရှိတဲ့ တောင်ဖက်တိုက်နေတာ ဒါနဲ့ ပြေးထွက်ခဲ့တယ်။

အနီးအနားက လူတွေပြောပြချက်အရ ပေါက်ကွဲအား အရမး်ပြင်းပါတယ် ၃ ကြိမ်ထက်မနည်းပေါက်ခဲ့ပြီး အိမ်တွေပါ တုန်သွားတဲ့ ပေါက်ကွဲချက်က မိှုပွင့်သဏ္ဏန် မီးတောက်ကြီးပါ တက်တဲ့ အကြောင်း ပြောပြတယ်။ ကျွန်တော့်အိမ်ကနေပါခံစားရတဲ့ ပြင်းထန်တဲ့ တုန်ခါမှုဟာ အဲဒီမီးလောင်ပြင်မှာရောက်နေတဲ့ မီးသတ်ရဲဘော်တွေအတွက် ကံမကောင်းနိုင်ဘူးဆိုတာ ချက်ချင်းတွေးမိပြီး စိတ်မကောင်းဖြစ်ရပါတယ်။ အဲဒီနားမှာပဲ ဓာတ်ပုံရိုက်နေရင်း လူ ၃ ယောက်က ကျွန်တော့်ကို သတင်းထောက်လားမေးပြီး သူတို့မှာ အပျက်အစီးအဆောက်အဦးတွေရှိတယ် လိုက်ရိုက်ပါ ပြောလို့ ဘာမှန်းမသိပဲ လိုက်ဖြစ်တယ်။ နဲနဲတော့ လန့်နေတယ် ကျွန်တော့်မှာက ရုံးကပေးတဲ့ ကင်မရာတွေကော lens တွေရော လွယ်ထားတယ် ကျောပိုးအိပ်ထဲမှာကောပဲ။ လုမလို့လား မသိဘူးပေါ့ သူတို့က မီးလောင်ပြင်နဲ့ ဝေးရာ တော်တော်ဝေးဝေးကို ခေါ်သွားပါတယ်။ နောက်တော့မှ ဗလီတစ်ခုထဲဝင်သွားပြီး အပျက်အစီးတွေပြမှ စိတ်အေးရတယ် တကယ်လိုက်ပြချင်တဲ့ သူတွေပါပဲပေါ့။ အဲဒီဗလီက မီးလောင်တဲ့ နေရာနဲ့ အတော်ဝေးပါတယ် ဒါပေမယ့် မျက်နှာချက် အလူမီနီယံတံခါးတွေ ပန်ကာ၊ အဲယားကွန်း၊ မှန်တွေအားလုံးက ဗုံးကွဲထားတဲ့ နေရာတစ်ခုလို့ ပြန့်ကျဲနေပါတယ်။ ဒါနဲ့ ဓာတ်ပုံရိုက် ဘလော့ဂ်မှာ တင်ရအောင် ဗီဒီယိုပါ ရိုက်ဖြစ်ပါတယ်။ အလူမီနီယံတံခါးတွေ ပန်ကာ၊ အဲယားကွန်း၊ မှန်တွေအားလုံးက ဗုံးကွဲထားတဲ့ နေရာတစ်ခုလို့ ပြန့်ကျဲနေပါတယ်။ ဒါနဲ့ ဓာတ်ပုံရိုက် ဘလော့ဂ်မှာ တင်ရအောင် ဗီဒီယိုပါ ရိုက်ဖြစ်ပါတယ်။

နောက်တော့ အဲဒီ အကိုတွေ ကားနဲ့လိုက်ပို့ပေးလို့ ဒေါပုံဘက်အခြမ်းပါရောက်ဖြစ်ပြီး အဲဒီဘက်မှာ ဖြစ်တဲ့ အိမ်နံရံပြိုကျတာတွေ တိုက်တွေ ကြွေပြားတွေကွာ ပက်ကြားအတ်သွားတာတွေ၊ တစ်ဖက်ကမ်းမှာ မီးလောင်နေတာတွေ ကိုပါ ရိုက်ခွင့်ရလိုက်ပါတယ်။ နောက်တော့ မီးလောင်တဲ့ စက်ဆန်းဘက်ပြန်ကူးတဲ့ အချိန်မှာတော့ မနက် ၅ နာရီကျော်ပြီမို့ မီးလဲ အတော်ထိန်းနိုင်သလောက် ဖြစ်သွားတာတွေ့ရသလို လူလဲ အတော်ရှင်းသွားပြီမို့ အိမ်ပြန်လာဖြစ်ပါတော့တယ်။ ရောက်ရောက်ချင်း သတင်းဓာတ်ပုံပို့ နောက် ဝဘ်ဆိုဒ်ရေးနဲ့ အခုဘလော့ဂ်ရေးနဲ့ ခုထိမနားရသေးပါဘူး အကျီလဲ မလဲရသေးဘူး။ ကံဆိုးချင်တော့ ပိုက်ဆံကားခတောင်မရှိလို့ ဒီနေ့ ညနေပိုင်း မီးသတ်က ကျဆုံးသွားတဲ့ ရဲဘော်တွေ အသုဘအခမ်းအနားတောင် သွားမရိုက်နိုင်တော့ပါဘူး။ ခုတော့ ပုံလဲ ၂ ပုံပဲတင်ထားပြီး ဗီဒီယိုတင်ပြီးနားပါတော့မယ့်။ အခုတင်ထားတဲ့ video ကို CNN channel ကနေ နောက် ၂၄ နာရီအတွင်းမှာ ပြပေးပါလိမ့်မယ်။ အသက်ပေးပြီးကာကွယ်သွားခဲ့ကြတဲ့ သူရဲကောင်း မီးသတ်တွေကို လေးစားမိပါတယ်။ ကောင်းရာသုဂတိလားကြပါစေ…..

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home
• Democracy Activists Pray At Shwe Da Gon Pagoda

မနေ့ညက အမှန်တော့ ဒီနေ့ မနက်အစောကြီးပေါ့ မြို့ထဲမှာ Shia မူစလင် များရဲ့ Ashura ပွဲ ရှိလို့ ဓာတ်ပုံသွားရိုက်ဖြစ်ပါတယ်။ ဒီပွဲ ရှိတယ်ဆိုတာ သိလို့ ညနေဘက်ကတည်းက ကြိုအိပ်ထားပြီး ညဘက် ၁၁ လောက်ထသွားဖြစ်ပါတယ်။ ဆူးလေ ဘုရားနားက လမ်းပေါ်မှာ ရှိနေတာ ဖြစ်ပါတယ် အဲဒီမှာ ကိုရဲအောင်သူ နဲ့ ဆုံပါတယ်။ အဲဒီမှာ ရောက်တော့ အခေါင်းပုံစံတစ်ခုကို လူတစ်စုထမ်းထားတာ ရှိပါတယ်။ နောက် အနက်ရောင်ဝတ် မူစလင်အမျိုးသမီးတွေ ရှိတယ်၊ ရင်ဘက်ကို လက်ဝါးနဲ့ ရိုက်ပြီး ဘုရားစာလို တစ်ခုခုကို ဆိုနေတဲ့ အမျိုးသား အုပ်စုကြီးလဲ ရှိပါတယ်။

နောက်တော့ လူအုပ်ကြီးဟာ ဆူးလေဘုရား မြို့တော်ခန်းမ နဲ့ ပန်းဆိုးတန်းလမ်းတွေကို ဖြတ်ပြီးတဲ့နောက် ၃၈ လမ်း အောက်ဘလောက်မှာ ရှိတဲ့ ဗလီကို ချီတက်ကြပါတယ်။ အဲဒီ ဗလီထဲမှာတော့ မြေပြင်မှာ သဲတွေခင်းထားတာရှိပါတယ် နောက် အဲဒီမှာမှ မီးကျီးခဲများကို ၁၀ ပေလောက် အရှည်ခင်းထားတာ တွေ့ရပါတယ်။ အဲဒီမှာ မီးတွေသိပ်နေကြပါတယ်။ နောက်တော့ မူစလင်ဘုရား စာလို စာတွေဖတ်နေတာတွေ့ရပြီးတဲ့ နောက် အဖြူဝတ် လှည့်လည်ကြသူတွေ တစ်ယောက်ပြီးတစ်ယောက် မီးနင်းပြီး တစ်ဖက်ကနေ တစ်ဖက်ကို ဖြတ်ကူးကြပါတယ်။ နောက် ကလေးတွေပါသလို အခြား အရပ်ဝတ်နဲ့ လူတစ်ချို့လဲ ဝင်နင်းတာကို တွေ့ရပါတယ်။

တစ်ဖက်တစ်ဖက် အပြန်ပြန်ကူးလိုက် မီးပြန်ညှိလိုက်နဲ့ လုပ်တာ ည ၂ နာရီလောက်မှ နားပါတယ်။ အဲဒီတုန်းက ဓာတ်ပုံရိုက်ဖို့ ဗလီကတာဝန်ရှိသူတွေ အများကြီးကူညီပေးတာကို ကျေးဇူးတင်ရပါတယ်။ လမ်းတစ်လျောက်လဲ ရိုက်ခွင့်ရသလို ဗလီ အတွင်းမှာလဲ အဆင်ပြေအောင် စီစဉ်ပေး နောက် ရိုးရာကို ရှင်းပြပေးကြပါတယ်။ အဲဒီတုန်းက နင်းတဲ့ သူတွေတော့ မသိဘူးဗျာ ဘေးနားကနေ ဓာတ်ပုံရိုက်ရတာတော်တော်ပူပါတယ်။ နောက် သူတို့ နင်းပြီးလွှင့်လာတဲ့ မီးခဲတစ်ချို့လဲ နင်းမသိသေးတယ်။ ဗလီထဲမှာ ဖိနပ်မစီးရဘူးဆိုတော့ ကင်မရာချောင်းရင်းနဲ့ မှားနင်းမိတယ်။ အခုကတော့ အဲဒီမှာ ရိုက်ခဲ့တဲ့ ပုံတစ်ချို့ပါ။ ဒီနေ့ညမှာတော့ ကိုယ့်ကိုကိုယ် ဓားနဲ့ မွှန်းမယ့် ပွဲ ညသန်းခေါင်ရှိသေးတာမို့ သွားရိုက်လိုက်ပါဦးမယ်။ ကျေးဇူးပါ…

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home
• Democracy Activists Pray At Shwe Da Gon Pagoda

November လထဲမှာ ဘလော့ဂ်ကို အသစ် မတင်ဖြစ်တာ အတော်ကြာသွားပါတယ်။ အလုပ်များနေတယ်ရယ် အလုပ်အားတော့ မတင်တာကြာတော့ ပျင်းသွားတာလဲ ပါပါတယ်။ အခုတော့ ဒီလ အစောပိုင်းက သွားဖြစ်ခဲ့တဲ့ တောင်ကြီး တန်ဆောင်တိုင် ပွဲတော်က ပုံတွေတင်လိုက်ပါတယ်။

တောင်ကြီးကို အစက သွားဖို့ မသေချာဖြစ်နေရာကနေ နောက်တော့ အလုပ်ကလဲ အနားရတာနဲ့ ၂ ညအိပ်ခရီးသွားဖြစ်ခဲ့ပါတယ်။ ဟိုမှာ မနက်ပိုင်းရောက်တုန်းကို ကိုရဲအောင်သူ၊ နန်းညီ၊ မထိုက်၊ ကိုဘိုဘို တို့နဲ့ အင်းလေး သွားဖြစ်ပါတယ်။ ညနေမှာတော့ တောင်ကြီး တက်ဖြစ်ပါတယ် နောက်တော့ တောင်ကြီးက တောင်ပေါ်ဘုရားသွားဖြစ်ကြပါတယ်။ ဘုရားမှာ တောင်ကြီးမြို့ အလှ ဓာတ်ပုံရိုက်ပြီးတော့ ကျွန်တော်တို့ တည်းကြတဲ့ ညီသျှား အိမ်ကိုပြန်ဖြစ်ပါတယ်။ ပြန်ရောက်တော့ ကျွန်တော်က တော်တော် ပင်ပန်းနေတာနဲ့ တန်းအိပ်ဖြစ်ပါတော့တယ်။ ည ၉ နာရီလောက်မှာ ပြန်ထွက်ပြီး မီးပုံပျံပွဲ ရှိတဲ့ ကွင်းသွားတာတောင် မလိုက်နိုင်တော့ဘူး ကျန်တဲ့သူတွေ အကုန်သွားကြတယ် ကျွန်တော်ကတော့ နောက်ရက် မှ ရိုက်မယ်ဆိုပြီး အိပ်နေခဲ့ပါတယ်။

တောင်ကြီးက နိုဝင်ဘာလဆိုပေမယ့် အေးစ ပြုနေပြီခင်ဗျ။ ညနေဆို မြူတွေကျတယ်။ တော်တော်အေးတယ် ဒါပေမယ့် သူ့ရဲ့ အအေးဆုံး မဟုတ်သေးဘူးဆိုတာ မနှစ်က ဒီဇင်ဘာမှာ သွားခဲ့သေးလို့ သိနေပါတယ်။ ညက အခန်း ပြတင်းပေါက်ကော အကုန်ပိတ်အိပ်တာတောင် အဲယားကွန်းဖွင့်အိပ်ရသလို တော်တော်အရသာ ရှိပါတယ်။ ဒီလိုနဲ့ ၂ ည ခရီးမှာ ၁ ည အိပ်လိုက်တယ်။ နောက်ရက်မှာတော့ နေ့လည်ဘက်မှာ နေ့လွှတ်မီးပုံးတွေရှိတာမို့ မီးပုံးပျံကွင်းကို ရောက်ဖြစ်ပါတယ်။ အခု မီးပုံးပျံကွင်းက အရင်လို စူလာမုနိ ဘုရားနားက ကွင်းမဟုတ်တော့ပါဘူး အဲဒီကနေ ဆက်သွားရတဲ့ မြို့ပြင် ရထားလမ်းနားနဲ့ အပြိုင်ဘက်က ကွင်းမှာ လုပ်တာဖြစ်ပါတယ်။ ဒီနေရာ အသစ်က ပိုကျယ်တာကို တွေ့ရပါတယ်။

နေ့လွှတ် မီးပုံးပုံတွေက တိရိစာ္ဆန်ပုံလေးတွေ ချိုးကြတာ ဖြစ်ပါတယ်။ ဓာတ်ပုံကတော့ မတင်တော့ပါဘူး ရိုက်ဖြစ်တုန်းက ကောင်းတဲ့ ပုံတွေက သတင်းဌာနကို ပို့လိုက်ပြီဆိုတော့ ဘာမှမကျန်တော့ပါဘူး။ သိပ်လဲမရိုက်ဖြစ်လိုက်လို့ပါ။ နောက်တော့ အိမ်ပြန်နားကြပြီးတဲ့နောက် ညဘက်မှာ ထွက်ဖြစ်ပါတယ်။ ပထမဆုံး ဆောင်းည လို့ နာမည်ပေးထားတဲ့ မီးပုံးဆင်တဲ့ ရက်ကွက်ဘက်ကို သွားဖြစ်ကြပါတယ်။ အဲဒီမှာ ညဘက်မှာလွှတ်မယ့် မီးပုံးကို ယမ်းခွေတွေ ဆင်နေတာ ဓာတ်ပုံရိုက်ဖြစ်ပါတယ်။ နောက်တော့ ဆိုင်ကယ်များနဲ့ပဲ မီးပုံးပျံပွဲကို သွားဖြစ်ပါတယ်။ လမ်းမှာ ကားတွေကော ဆိုင်ကယ်တွေကော အတော်ရှုပ်ပြီး များပါတယ်။ ကားနဲ့ဆို ကွင်းရောက်အောင် စီတန်းနေရာတာနဲ့ တော်တော်ကြာသွားနိုင်ပါတယ်။ ဆိုင်ကယ်နဲ့ ဆိုတော့ ဟိုတိုးဒီတိုးနဲ့ ရောက်သွားပါတယ်။ ရောက်တော့ ကွင်းမှာက ကြယ်နီ လို့ နာမည်ပေးထားတဲ့ မီးပုံးလွှတ်ဖို့ မိှုင်းတိုက်နေတာ ကိုတွေ့ရပါတယ်။

ကိုရဲအောင်သူ ဆိုင်ကယ် မရောက်သေးတာကြောင့် အဝေးကနေပဲ အဲဒီ မီးပုံးကို 70-200 နဲ့ ရိုက်ဖြစ်ပါတယ်။ ရိုက်နေတုန်းမှာပဲ မီးပုံးမိှုင်းပြည့်ပြီး စလွှတ်ပါတယ်။ မီးပုံးက အပေါ်ကိုမတက်သွားပဲ မြေပြင်နဲပ ၁၅ ပေလောက် အကွာမှာ ဘေးတိုက်ရွှေ့ပါတော့တယ်။ နောက်တော့ ကွင်းဘေးက ဓာတ်တိုင်နဲ့ ချိတ်ပြီး အောက်မှာတင် မီးပန်းတွေ ပေါက်ကွဲပါတယ်။ မီးပန်းများက မြေပြင်ကို ရှုပ်ပြေးလာတာက မသိရင် စစ်ပွဲမှာ ကျည်ဆံတွေ ပြေးနေသလိုပါပဲ။ မတော်တဆ ဖြစ်ရပ်ပေမယ့် တော်တော်တော့ ကြည့်လို့ကောင်းပါတယ်။ ဒါနဲ့ ဘလော့ဂ်မှာ ပြန်တင်မယ်ဆိုပြီး ဘေးနားက ဝါးလုံးတိုင်ကိုပြေးလက်ထောက်ပြီး တယ်လီနဲ့ ဗီဒီယို ရိုက်ဖြစ်ခဲ့ပါတယ်။ အခု ဒီပို့စ်မှာ ကြည့်လို့ ရပါတယ်။ အဲဒီ ကြယ်နီ မီးပုံးက တောင်ကြီး တန်ဆောင်တိုင် မီးပုံးပျံပွဲမှာ သက်တမ်း အရှည်ဆုံး မီးပုံးဖြစ်တယ်လို့ ညီသျှားပြောလို့ သိရပါတယ်။ သူက သတ်မှတ် ယမ်းအလေးချိန်ထက်ပိုပြီး ယမ်းခွေလိုက်တော့ မိှုင်းပြည့်တာတောင် အပေါ်မတက်နိုင်ပဲ အောက်မှာပဲ ပေါက်ကွဲကုန်တာ ဖြစ်ပါတယ်။ ဆိုင်ကယ် အချို့နဲ့ စျေးဆိုင် အချို့ မီးလောင်ပျက်စီးသွားပါတယ်။ ကြယ်နီ မီးပုံးကတော့ ၁ နှစ် အပိတ်ခံလိုက်ရတယ်။

နောက်တော့ အောက်ဘက်မှာ မီးပုံး တစ်လုံးရိုက်ဖြစ်ပြီးတဲ့နောက် တစ်ဖက်ခြမ်းတောင်ခြေအစပ်မှာ ဆောက်ထားတဲ့ သစ်သားမျှော်စင်ပေါ်ကို တက်ရိုက်ဖြစ်ပါတော့တယ်။ အပေါ်ကနေ 70-200 နဲ့ပဲ tripod မှာ ဆင်ပြီးရိုက်ဖြစ်ပါတော့တယ်။ အဲဒီ စင်ပေါ်ကနေ ပထမဆုံး ရိုက်ရတဲ့ မီးပုံးက ထွက်တဲ့ မီးပန်းတွေနဲ့ လူပုံကတော့ အကြိုက်ဆုံးလို့ ပြောလို့ ရပါတယ်။ မီးပုံးပျံ ပုံမပါပေမယ့် တော်တော်ကြိုက်ပါတယ်။ အဓိကက မီးပန်းပေါက်ကွဲအား scale ကို ပုံထဲက လူအရွယ်အစားနဲ့ တိုင်းလို့ ရသလို silhouette လေးတွေကလဲ ပုံကို အားဖြည့်လိုက်သလို ဖြစ်သွားတာပါမယ်။

နောက်တော့ မီးပုံးတွေ အဲဒီပေါ်ကနေပဲ ဆက်ရိုက်ဖြစ်တယ် တစ်ချို့ မီးပုံးတွေက မီးပန်း အရမ်းလှတယ်။ တစ်ချို့က သိပ်မလှဘူး.. တစ်ချို့က glider မီးပန်းတွေပါပါသေးတယ် အပေါ်အမြင့်ကြီးရောက်မှ လင်းနို့တွေလို့ အောက်ဖက်ကို ၁၀ ပေလောက်ဆင်းပြီးမှာ အောက်ဘက်မှာ ဝဲပြီး ပန်းထွက်တဲ့ မီးတွေရှိတယ်။ တစ်ချို့မီးပုံးတွေက ရေတံခွန်လို မီးပန်းတွေကျတာလဲ ရှိသေးတယ်။ တစ်ချို့ကကျတော့ အရပ် ၈ မျက်နှာကို မီးပန်းတွေလွှတ်သလို တစ်ဆင့်ပြီး တစ်ဆင့်ထွက်တယ်။ မီးပန်းတွေထွက်တိုင်းလဲ အောက်ဖက်က ပြိုင်ပွဲဝင် အဖွဲ့သားတွေရဲ့ ဟေး ဟေး အော်သံ ရှမ်းအိုးစည်သံတွေလဲ ကြားရပါမယ်။ ချုပ်ပြောရရင် တော်တော်လှတဲ့ ညပါ။ မြန်မာပြည်မှာ ဒီလို ကိုယ်ပိုင် ရိုးရာ ယဉ်ကျေးမှု့ ပွဲတော်တွေ ရှိတာ အရမ်းဂုဏ်ယူဖို့ ကောင်းတယ်လို့ ခံစားရတယ်။ တစ်ညလုံး ခေါင်းတစ်မော့မော့နဲ့ အပေါ်ဘက်က မီးပန်းတွေ နဲ့ လင်းလင်းသွားတာပါပဲ။ အဲဒီ မျော်စင်ပေါ်မှာပဲ တစ်ညလုံး မီးပုံးကုန်တဲ့ အထိ နေခဲ့ကြပါတယ်။ နောက်ဆုံး တစ်လုံးကျန်တဲ့ အချိန်မှာ အောက်ဆင်းပြီး wide နဲ့ အနီးကပ်ပြန်ရိုက်ဖြစ်ပါတော့တယ်။ နောက်တော့ အဲဒီ မီးပုံးပျံအဖွဲ့တွေရဲ့ ဟိုင်းလတ်ကားကိုပဲ ခေါင်မိုးပေါ်ကစီးပြီး ပြန်ခဲ့ကြတယ်။

အမှန်တော့ ၂ ညအိပ်ဆိုပြီး အသွားအပြန် စီစဉ်ထားတာ မဝလိုက်သလိုပါပဲ အလုပ်ရှိလို့ ပြန်လာရပေမယ့် နောက်နှစ်တော့ အကြာကြီး နေပစ်မယ် စိတ်ကူးတယ်။ တောင်ကြီးဟာ ဒီ တန်ဆောင်တိုင် မီးပုံးပျံပွဲတော်ကာလ ဆိုရင် ဟိုတယ်ကော တည်းခိုခန်းပါမကျန် လူပြည့်တတ်တာမို့ မိတ်ဆွေတို့ သွားမယ်ဆိုလဲ ကြိုတင် booking လုပ်ထားဖို့ လိုအပ်ပါလိမ့်မယ်။ ရာသီဥတု အေးတာရှိတယ်နောက် မီးပုံးလွှတ်တဲ့ စည်းဝိုင်းထဲဝင်မယ်ဆို မီးမပေါက်လွယ်တဲ့ jean လို ဘောင်းဘီ jacket တွေဝတ်ဖို့ လိုအပ်ပါလိမ့်မယ်။ မဝင်ပဲ ခပ်လှမ်းလှမ်းက ကြည့်မယ်ဆို ပိုအဆင်ပြေပါတယ်။ မကြုံဖူးသေးတဲ့ မိတ်ဆွေများလဲ သွားကြည့်သင့်ပါတယ်။ နိုင်ငံတကာမှာ မီးပုံးပျံပွဲတွေ နေရာတိုင်းရှိပေမယ့် ဒီလို မိှုင်းခံစက္ကူ၊ ရိုးရာ ယမ်းခွေနဲ့ မီးပန်းအလှ၊ ဗုဒ္ဒဘာသာ ကို အခြေခံထားတဲ့ ယဉ်ကျေးမှု့ ပွဲတော်မျိုးကတော့ ဒီနေရာမှာပဲ ရှိပါလိမ့်မယ်။ ကောင်းကင်မှာ မီးအလှတွေနဲ့ ညတွေက ဘယ်မှာမှ ကြုံရမှာ မဟုတ်တဲ့ အတွေ့အကြုံတွေ ဖြစ်ပါလိမ့်မယ်။ အခုတင်ထားတဲ့ ပုံတွေအားလုံးဟာ ကျွန်တော့် အကျင့်အတိုင်း မူလအတိုင်းပဲ တင်ထားပါတယ် နဲနဲလေးမှ exposure, lighting တောင် ပြင်မထားပါဘူး။ ရေစာတပ်၊ ဆိုဒ်သေးပဲလုပ်ထားပါတယ်။ အမှန်တော့ ဒီပုံတွေက ကျွန်တော့် အလုပ်က မသုံးပဲကျန်ထားခဲ့တဲ့ ပုံတွေဖြစ်ပါတယ်။ ပိုကောင်းတာတွေကတော့ သတင်းဌာန ရောက်သွားလို့ မတင်တော့ပါဘူး။ ကျေးဇူးပြုပြီး ပုံများကို မီဒီယာတွေ အခြားနေရာတွေမှာ ပြန်မသုံးဖို့ မေတ္တာ ရပ်ခံပါတယ်။ ကျေးဇူးပါ။

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Korean Film Festival 2011
• A Visit to Uncle Za Ga Nar Home
• Democracy Activists Pray At Shwe Da Gon Pagoda

ဒီနေ့ အောက်တိုဘာလ ၂၂ ရက်နေ့မှာ Junction မော်တင်က Korean Film Festival 2011 ကို သွားဖြစ်ပါတယ်။ ဒီပဲွကို ကိုဘို ပြောထားလို့ ကိုရီးယားက မင်းသား နဲ့ မင်းသမီးလာမယ်ဆိုတာလဲ အစောကတည်းက ကြိုသိထားပါတယ်။ ကိုဘိုကပဲ press card စီစဉ်ပေးတာကြောင့် ဒီနေ့ ရောက်ခဲ့တာပါ ပွဲကို ညနေ ၃ နာရီမှာ စတင်ပါတယ်။

ပွဲအစမှာ ခေမီကို နဲ့ အဖွဲ့ကပြီး နောက်မှာတော့ အခု ပွဲကို လာတဲ့ ကိုရီးယား မင်းသား Chio Soo Jong နဲ့ မင်းသမီး So Yi Hyun တို့ အကြောင်းကို ပဟေဋိ အနေနဲ့ ပရိတ်သတ်ကို မေးပြီး လက်ဆောင်တွေ ပေးပါတယ်။ နောက်မှာတော့ မင်းသား၊ မင်းသမီး ရောက်လာပြီး ပရိတ်သတ်ကို နှုတ်ဆက်စကား ပြောပါတယ်။ ကိုရီးယားလို ပြောတာဖြစ်ပြီး စကားပြန်တစ်ယောက်က ဘာသာပြန်ပေးတာပါ။

နောက် မင်းသား နဲ့ မင်းသမီး ကို အမေးအဖြေ လုပ်ပြီးတဲ့ နောက် ပရိတ်သတ်ကို အမှတ်တရ လက်မှတ်ထိုးပေးတာ၊ နောက် ဓာတ်ပုံ အတူတွဲရိုက်တာ လုပ်ပါတယ်။ နောက်မှာတော့ ကိုရီးယား မင်းသားနဲ့ မင်းသမီး ပြန်သွားတဲ့နောက် ကိုရီးယား စတိုင်ဖက်ရှင် ပွဲဆက်ပါတယ်။ နောက်မှာတော့ အခန်းအနားပြီးဆုံးပါတယ်။

ညနေ ဘက်မှာတော့ Junction Maw TIn ရဲ့ အပေါ်ဆုံးထပ် ရုပ်ရှင်ရုံတွေရှိတဲ့ Junction Cineplex မှာ ရုပ်ရှင်ပွဲတော် ရုပ်ရှင်ပြပွဲ ပြုလုပ်ပါတယ်။ အပေါ်ဘက်မှာတော့ ကိုရီးယား နိုင်ငံသံရုံးတာဝန်ရှိသူတွေ နဲ့ ရုပ်ရှင်ပွဲတော် ကြည့်ခွင့်ရ ပရိတ်သတ်တွေ ကို ကိုရီးယား ရုပ်ရှင်အချို့ ပြပေးပြီးနောက် ဒီနေ့ ပွဲဖြစ်မြောက်အောင် ဆောင်ရွက်ပေးတဲ့ သူတွေကို ကိုရီးယားသံရုံး၊ စပွန်ဆာပေးတဲ့ ရွှေတောင် company တို့ကနေ အမှတ်တရ လက်ဆောင်ပေးတာကို တွေ့ရပါတယ်။ ပြီးတဲ့ နောက်မှာတော့ ဒီနေ့ ပွဲကို နားလိုက်ပါတယ်။

ဒီနေ့ပွဲမှာ ကိုရီးယား မင်းသမီးကို အနီးကပ်မြင်ဖူးလိုက်ရတာ ရှိပါတယ်။ မင်းသားအကြောင်းတော့ ထည့်မပြောတော့ဘူး စိတ်မဝင်စားလို့ ဟီး =) မင်းသမီးက ပိန်ပိန် ပါးပါးနဲ့ခင်ဗျ ပြင်ထားလား ဘာလားတော့မသိဘူး ချစ်စရာကောင်းပါတယ်။ မင်းသမီးမို့လား မသိဘူး စက္ကန့်မလပ် လှအောင် နေတတ်ပုံရပါတယ် ရယ်နေတဲ့ အချိန်ရိုက်လဲ လှနေတာပဲ။ တစ်ခုတော့ ရှိတယ် personally အနေနဲ့ဆို မင်းသမီး ထက် ကိုရီးယားသံရုံးက ကိုရီးယားမတစ်ယောက်ကို စိတ်ဝင်စားပါတယ် ရှေ့ဆုံးခုံမှာ ထိုင်တယ် မင်းသမီးမဟုတ်ပေမယ့် ပုံတွေရိုက်ထားလိုက်သေးတယ်။ အစက မင်းသမီး PA မှတ်နေတာ။

မင်းသားရော မင်းသမီးရော ကိုရီးယားကား သိပ်မကြည့်ဘူးပေမယ့် မြင်ဖူးနေပါတယ်။ ဘယ်ကားထဲမှာ ပါခဲ့တာလဲတော့ မသိပါဘူး။ ရုပ်ရှင်ပွဲတော်မှာ ပြမယ့်ကားတွေထဲတော့ သူတို့ကား မပါပါဘူး။ သက်သက်လာပေးတာ ဖြစ်မယ်ထင်ပါတယ်။ ကိုရီးယားရုပ်ရှင် ပွဲတော်ကို အောက်တိုဘာလ ၂၁ ရက်ကနေ ၂၄ ရက်နေ့ အထိ Junction Maw Tin, Cineplex မှာ ကျင်းပသွားမှာ ဖြစ်တယ်လို့ သိရပါတယ်။

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• A Visit to Uncle Za Ga Nar Home
• Democracy Activists Pray At Shwe Da Gon Pagoda

ဒီနေ့ ၁၃ ရက်နေ့ အောက်တိုဘာ နေ့လည်ခင်း ဘက်မှာ ၁၂ ရက်နေ့ မနေ့က ထောင်ကနေ ပြန်လွှတ်လာတဲ့ ဟာသသရုပ်ဆောင် ဦးဇာဂနာ အိမ်ကို အလည်ရောက် ဖြစ်ပါတယ်။ အမှန်တော့ မနေ့ကလဲ ကျွန်တော် ဦးဇာဂနာ မြစ်ကြီးနားကနေ လေယာဉ်နဲ့ ရောက်လာတာကို လေဆိပ်မှာ စောင့်ပြီး ဓာတ်ပုံ ရိုက်ဖြစ်ခဲ့ပါသေးတယ် ကံမကောင်းချင်တော့ 5D ရှပ်တာနဲနဲ ကြောင်သွားပြီး ပုံတွေ သုံးမရလိုက်ဘူး။ ဒါနဲ့ ဒီနေ့ ကိုငြိမ်းချမ်း နဲ့ အတူ ရောက်ဖြစ်ရင်း ဓာတ်ပုံ ရိုက်ဖြစ်တာလဲ ပါပါတယ်။

ကျွန်တော်တို့ ရောက်တော့ အဲဒီမှာ ဦးဇာဂနာ အပြင် ဦးမေတ္တာ၊ သီး ၂ သီးနဲ့ ကိုဂေါ်ဇီလာ နောက် အင်တာလာဗျူးတဲ့ the voice က အဖွဲ့သားတွေ ကို တွေ့ရပါတယ်။ အင်တာဗျူး နေသလို ဦးဇာဂနာက မြစ်ကြီးနား ထောင်မှာ သူ ဦးဆောင်လုပ်ခဲ့တဲ့ ထောင်တွင်း စာကြည့်တိုက် အကြောင်းကို ပြောပြပေးပါတယ်။ စာဖတ်တဲ့ ထောင်သားတွေ များလာတဲ့ အတွက် ပိတီဖြစ်ရတဲ့ အကြောင်းကို ဟာသနှောပြီး ပြောပါတယ်။ နောက် စာဖတ်ဝိုင်းလဲ နေ့စဉ်လုပ်ထားတဲ့ အကြောင်းပါ ပြောပါတယ်။

နောက် the voice လဲပြန်သွားပြီးတဲ့ နောက် သတင်းထောက်မရှိတော့တာမို့ ဦးဇာဂနာက လက်ရှိ သီး ၂ သီးနဲ့ ကိုဂေါ်ဇီလာတို့ စီစဉ်နေတဲ့ မျှော်စင်ကျွန်း အငြိမ့် အကြောင်းကို မေးမြန်းတာတွေ့ ရပါတယ်။ ဦးဇာဂနာက သူ့အနေနဲ့ သဘောမကျကြောင်း ကျန်တဲ့ သီး ၂ သီးပါ နိုင်ငံခြားက ပြန်ရောက်လာမှ လုပ်စေချင်ကြောင်းပြောပါတယ်။ အဲဒီလို ပြန်လာမှ လုပ်မယ်ဆို သူကော ဦးမေတ္တာကော ပါ ဝင်က မှာ ဖြစ်ကြောင်းဆိုပါတယ်။ ဒီလထဲ လုပ်ဖို့ စီစဉ်ထားတာကို ဖျက်ဖို့ ဘာတွေ လိုသလဲ မေးမြန်းတာတွေ့ရပါတယ်။ သူ့ အနေနဲ့ ကတော့ လူညီပြီး စုံမှ ကြီးကျယ်ပြီး အောင်မြင်အောင် လုပ်စေချင်ကြောင်း ပြောတာကို ကြားရပါတယ်။

ဒီကြားထဲ မှာပဲ ဦးဇာဂနာ မိတ်ဆွေ တစ်ယောက်ခဏ ဝင်လာပြီး နှုတ်ဆက်ရင်း english ပုံပြင်စာအုပ် တစ်အုပ် အထူကြီး လက်ဆောင် လာပေးတာကိုလဲ တွေ့ရပါတယ်။ update ~ အဲဒီ စာအုပ်က အန်တီ ဒေါ်အောင်ဆန်းစုကြည် လက်ဆောင်ပေးတာလို့ သိရပါတယ် အထဲမှာလဲ ဝမ်းမြောက်ကြောင်းရေးထားတဲ့ post card တစ်ခုပါပါတယ်။ နောက်တော့ Envoy ဂျာနယ် က သတင်းထောက်၂ ယောက် ထပ်ရောက်လာပြီး မေးမြန်းဖို့ လုပ်တာကြောင့် ကျွန်တော်တို့လဲ အိမ်ခန်းထဲ လူကျပ်နေမှာ စိုးတာကြောင့် ဦးမေတ္တာနဲ့ အတူတူ ပြန်ဖြစ်ခဲ့ကြပါတယ်။ ဦးဇာဂနာ ကြီး ကျန်းကျန်းမာမာ ပြန်လွတ်လာတာကို တွေ့ရတာ ဝမ်းသာမိပါတယ်။ ဒါပေမယ့် ဦးဇာဂနာ နဲ့ မရှေးမနှောင်း အတူတူ ထောင်ကျခဲ့တဲ့ ဘလော့ဂ်ဂါ ကိုနေဘုန်းလတ် မလွတ်သေးတာကိုတော့ စိတ်မကောင်းဖြစ်မိပါတယ်။ အမြန်ဆုံး ပြန်လွတ်စေချင်ပါရဲ့ ……

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• Democracy Activists Pray At Shwe Da Gon Pagoda

ဒီနေ့ စက်တင်ဘာလ ၂၇ ရက် နေ့မှာ မနက် NLD ရုံးဘက်ရောက်ဖြစ်ပါတယ်။ အမျိုးသား ဒီမိုကရေစီ အဖွဲ့ချုပ်ရဲ့ တည်ထောင်တဲ့ နှစ်ပတ်လည် ရှိတာကြောင့်ပါ… ဓာတ်ပုံတော့ သေချာမရိုက်ဖြစ်ပါဘူး မဟုတ်လဲ သတင်းအနေနဲ့ သုံးမှာ မဟုတ်တဲ့ အတွက် အနီးအနားကနေပဲ စောင့်ကြည့်နေလိုက်ပါတယ်။ ပွဲပြီးတဲ့ နောက်မှာတော့ ရွှေတိဂုံ ဘုရားပေါ်မှာ ဒီနေ့ နိုင်ငံရေး အကျဉ်းသားတွေ လွတ်မြောက်ဖို့ ဆုတောင်းပွဲ ရှိတယ် လို့ ပြောကြတာနဲ့ ဘုရား ရင်ပြင်တော်ပေါ်ကို အခြား စီနီယာ ဓာတ်ပုံသတင်းထောက်တွေ နဲ့ အတူတူ တက်ခဲ့ပါတယ်။

ရွှေတိဂုံ ရင်ပြင်တော်ကိုရောက်တော့ ထူးခြားတာ သိပ်မတွေ့ရပါဘူး ဒါနဲ့ ခဏစောင့်ကြည့်ပြီးတဲ့နောက် ရင်ပြင်တော်ပေါ်ကို တစ်ပတ်ပတ်ကြည့်တော့ အင်္ဂါထောင့်လောက်မှာ Concern for Myanmar ဆိုတဲ့ စာသားပါတဲ့ တီရှပ်ဝတ် ၂ ယောက်ကို တွေ့ရတာကြောင့် အဲဒီထောင့်နားမှာပဲ စောင့်ကြည့်ဖြစ်ပါတယ်။ ၁၅ မိနစ်လောက်နေတော့ အင်္ဂါထောင့်ဘက်ကနေ အဝါရောင် အကျီဝတ် တစ်ချို့၊ နောက် အဖြူရောင် အကျီ နဲ့ အခြား ပုံမှန်ဝတ်စားထားသူတစ်ချို့ အုပ်စုလိုက် ထွက်ပြီး အရှေ့ဘက်မုဒ် ပြသာဒ်ဘေးက ရင်ပြင်မှာ တန်းစီပြီ ဘုရားဝတ်ပြု ကြတာမို့ ဓာတ်ပုံ စရိုက်ဖြစ်ပါတယ်။

လူဦးရေ ၂၀ ဝန်းကျင်လောက်သာရှိပါတယ်။ ဘုရားဝတ်ပြုနေချိန် ရောက်နေတဲ့ သတင်းထောက်များရော၊ အရပ်ဝတ် ရဲအရာရှိများပါ ဓာတ်ပုံရိုက် မှတ်တမ်းယူကြပါတယ်။ နောက်တော့ သူတို့ အဖွဲ့က ဘုရားကို လက်ဝဲရစ် အတိုင်း လှည့်ပါတယ် နောက်တော့ အောင်မြေအရောက်မှာ သပြေပန်းကပ်ပြီးတဲ့နောက် အောာင်မြေ အနောက်ဘက်က ဓာတ်လှေကားကနေပဲ ဆင်းပြီးပြန်သွားကြတာ တွေ့ရပါတယ်။ လူဦးရေ ၂၀ ဝန်းကျင်လောက်သာရှိပါတယ်။ ဘုရားဝတ်ပြုနေချိန် ရောက်နေတဲ့ သတင်းထောက်များရော၊ အရပ်ဝတ် ရဲအရာရှိများပါ ဓာတ်ပုံရိုက် မှတ်တမ်းယူကြပါတယ်။ နောက်တော့ သူတို့ အဖွဲ့က ဘုရားကို လက်ဝဲရစ် အတိုင်း လှည့်ပါတယ် နောက်တော့ အောင်မြေအရောက်မှာ သပြေပန်းကပ်ပြီးတဲ့နောက် အောာင်မြေ အနောက်ဘက်က ဓာတ်လှေကားကနေပဲ ဆင်းပြီးပြန်သွားကြတာ တွေ့ရပါတယ်။ ဒီနေ့ပဲွ ကို အရင် အင်္ဂါဝတ် အသင်း ခေါင်းဆောင် နဲ့ နိုင်ငံရေးလှုပ်ရှားသူ ဒေါ်နော်အုန်းလှ ဦးဆောင်တယ်လို့ သိရပါတယ်။ အခြားသူတွေကိုတော့ ကျွန်တော်လဲ နာမည်မသိပါဘူး။ မနေ့ကလဲ ဆူးလေ ဘုရားမှာ ဒလ ဘက် အခြမ်းကလာရောက်တဲ့ အကျီအဝါရောင်ဝတ် ဘုရားဝတ်ပြုသူတွေ ရှိပါတယ်။ ဒီနေ့လူတွေကတော့ အကျီတူပေမယ့် တစ်ချို့ ကို မနေ့က ကျွန်တော် မတွေ့မိပါဘူး။ မနေ့ကလဲ ပုံတွေ ရိုက်ဖြစ်ပေမယ့် သတင်းဂျာနယ် အတွက် သုံးမှာ ဖြစ်လို့ အွန်လိုင်းမတင်ဖြစ်တော့ပါဘူး။ ဒါကတော့ ဒီနေ့ ရိုက်လာဖြစ်တဲ့ ပုံတွေဖြစ်ပါတယ်…

Democracy Activists Pray At Shwe Da Gon Pagoda to free all Political Prisoners

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home

ဒီနေ့ စက်တင်ဘာလ ၂၂ ရက် ညနေပိုင်းမှာ ကိစ္စလေးရှိလို့ ကျွန်တော်ရယ် ကိုငြိမ်းချမ်းနိုင် ရယ် မြို့ထဲ ၂၉ လမ်းဘက်ရောက်ဖြစ်ပါတယ်။ ၂၉ လမ်းနဲ့ အနော်ရထာလမ်း ထောင့်တစ်နေရာမှာတော့ လူတွေ အုံပြီးကြည့်နေတဲ့ လမ်းဘေးစျေးသည်ရှိတာ ကြောင့် အဝေးကလှမ်းကြည့်လိုက်တော့ မုန်လာဥနီ တွေကို လှီးပြထားတာ တွေ့လို့ ဓားတို့ အခြား ဟင်းချက်ရာမှာ သုံးတဲ့ ပစ္စည်းတွေ ရောင်းတာလို့ သိလိုက်ပါတယ်။ အနားကပ်ကြည့်တော့မှ ထူးခြားတာတွေ့ရတော့တယ်။

ရောင်းနေတဲ့ လမ်းဘေးစျေးသည်က တရုတ်ကြီး ခင်ဗျ… တရုတ်လိုတွေ ပြောရင်း လှီးပြနေပြီး တစ်ချက်တစ်ချက် “တစ်ထောင်… တစ်ထောင်..” ဆိုတဲ့ မြန်မာလို ပြောတာလေးတော့ ကြားရတယ်။ ဘေးနားရောက်လာတဲ့ လူက ဘယ်လောက်လဲ မေးတာကိုလဲ မသိလို့ ပြန်မဖြေပါဘူး။ သူသိတာက “တစ်ထောင်” ပဲပြောတယ် ကြည့်နေတုန်းမှာပဲ ၃ ယောက်လောက် ဝယ်တာတွေ့ရတယ်။ သေချာတာကတော့ နိုင်ငံခြားက လာတဲ့ တရုတ်ဆိုတာ သေချာပါတယ်။ ကြားရတာက tourist visa နဲ့ လာတယ်လို့ ကြားမိတယ် မသေချာပါဘူး။ နောက်တစ်ခုက မြန်မာမဟုတ်တာ ပိုသေချာတာက အဲဒီအချိန်ဆို လမ်းဘေးမှာ စျေးရောင်းလို့ မရသေးပါဘူး။ သူတစ်ယောက်ပဲ စည်ပင်လဲ မကြောက်ရောင်းနေတာ… ဒါနဲ့ပဲ ထူးဆန်းလှချည်ရဲ့ ဆိုပြီး ကျောပိုးအိတ်ထဲက ကင်မရာထုတ်ပြီး မှတ်တမ်းတင်လိုက်ပါတယ်။ အစက ဓာတ်ပုံပဲ ရိုက်ထားတာ အသံပါပါအောင် ဗီဒီယိုပါ ကောက်ဆွဲထားလိုက်ပါတယ် ရှု့စားကြပါကုန်

Related Posts

• Explosion At A Warehouse in Yangon, Myanmar
• The Aftermath Of Explosion At Warehouse in Yangon
• NLD Party’s Charity Music Concert
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home

ဒီနေ့ facebook မှာ မောင်ပြုံး နဲ့ ကိုမောင်မောင်ဆန်း တို့ ပြောလာလို့ အသစ်ထွက်မယ့် Microsoft Windows 8 မှာ မြန်မာယူနီကုတ် ဖောင့် စပြီး built in ပါတော့မယ် ဆိုတာသိရပါတယ်။ Microsoft က Windows 8 Developer Preview ကို ပြီးခဲ့တဲ့ ရက်ကမှ ထုတ်ပေးလိုက်တာ ဖြစ်ပြီး UI က Windows Phone 7 OS လို လေးထောင့်ကွက်လေးတွေနဲ့ ဆိုတာ CNET TV မှာ တစ်နေကမှ ကြည့်ထားမိပြီး download ဆွဲသေးတယ် 3.6 GB ဆိုတော့ တစ်ဝက်နဲ့ တင် မတက်တာနဲ့ မလုပ်ဖြစ်တော့တာ ဒီနေ့ ယူနီကုတ် ဖောင့် တရားဝင် ပါမယ် ကြားရတော့ တော်တော်ပျော်သွားပါတယ်။

Windows 8 ကို 64-bits, 32-bits developer preview ထုတ်ပေးထားတာတွေ့ရပြီး ဒီ OS က standard laptops, desktops နဲ့ tablets တွေမှာ run မှာ ဖြစ်တယ်လို့ ဆိုလာပါတယ်။ အခြား features တွေတော့ သေသေချာချာကို ရှာမဖတ်ဖြစ်ပေမယ့် ဒီဖောင့်ပါလာမယ့် ကိစ္စကတော့ တကယ့်ဝမ်းသာစရာပါ။ အထဲမှာ Myanmar Text ဆိုတဲ့ နာမည်နဲ့ regular အမျိုးအစား ဖောင့်ပါလာမှာပါ။ အထဲမှာ ဗမာစာ အပြင် တိုင်းရင်းသား စာလုံးတွေပါပါတယ်။ လက်ရှိတော့ ရှမ်းပါတာကိုတော့ တွေ့မိပါတယ်။ အခြား တိုင်းရင်းသား စာလုံးတွေ မသိလို့ ပါမပါ မပြောတတ်ပါ။ ဒီဖောင့်ကို ဒီဇိုင်းရေးဆွဲပြီး မူပိုင်ခွင့်ကို Microsoft က ပိုင်တယ်ဆိုတော့ နိုင်ငံခြားသားတွေ လုပ်ထားတာ သေချာပါတယ်။ Font creator က John Hudson လို့ သိရပါတယ်။

အားလုံးအရင်ကတည်းက ပြောခဲ့တဲ့ အတိုင်းပါပဲဗျာ ယူနီကုတ် ဟာ နိုင်ငံတကာ standards ဖြစ်တာမို့ Apple ပဲဖြစ်ဖြစ် Microsoft, Google, Sun, Oracle စတဲ့ ဘယ် company ပဲဖြစ်ဖြစ်ပါ တစ်ချိန်ကြရင် မြန်မာစာကို သူတို့ အထောက်အပံ့ပေးချင်တဲ့အခါ Unicode စနစ်ကို လိုက်နာထားတဲ့ ဖောင့်ကို ယူသုံးမှာ သေချာပါတယ်။ ပထမဆုံး Apple, Microsoft ကတော့ ပါလာနေပြီဗျာ Google, Android ဆိုတာ သိပ်မကြာတော့ပါဘူး။ ယူနီကုတ်မှာ အရင်ကတည်းကလဲ နားလည်သလောက် ရေးခဲ့ဘူးပါတယ် အားသာချက်တွေ အများကြီးရှိပါတယ်။ ဒီလို စနစ်ကျတဲ့ မြန်မာစာ အဆင့်ကို အားလုံး အတူတူတက်လှမ်းနိုင်မယ်ဆိုရင် စာကို အသံထွက်ဖတ်ပေးတဲ့ စနစ်တွေ၊ အသံနဲ့ မြန်မာစာရိုက်လို့ ရမယ့်စနစ်တွေ၊ ဘာသာ စကားတစ်ခုကနေ တစ်ခုကို အလိုလျောက်ဘာသာပြန်ပေးနိုင်မယ့် စနစ်တွေ ဆိုတာက မဝေးတော့တဲ့ ကာလမှာ ရောက်လာတော့မှာပါ။ အားလုံးကို နောက်တစ်ခေါက် ထပ်တိုက်တွန်းပါရစေဗျာ ယူနီကုတ် နဲ့ မြန်မာစာပေ ကို လူကရေးရုံ၊ မျက်စိနဲ့ ဖတ်ရုံမကပဲ မြန်မာစာနဲ့ ကွန်ပျူတာကို ခိုင်းစားလို့ ရတဲ့ အဆင့်ရောက်အောင် အတူတူတက်လှမ်းကြပါစို့ဗျာ….

Know More About Myanmar Unicode

Why Unicode?

Why I changed my blog to Unicode

HTZ Interviewed With VOA, Lawka Ahla

Lion ~ First Well Known OS Comes with Myanmar Unicode

Related Posts

• The Aftermath Of Explosion At Warehouse in Yangon
• NLD Party’s Charity Music Concert
• Explosion At A Warehouse in Yangon, Myanmar
• Shia Muslims Mark Ashura in Yangon 2011
• Taung Gyi Traditional Hot Air Balloon Festival
• Korean Film Festival 2011
• A Visit to Uncle Za Ga Nar Home